Tamarayt taɣelnawt n RCD temlal deg yiwet n temlilit i d-yettilin yal ayyur. Deg unejmuɛ-a iɛeggalen n usaqamu aɣelnaw n RCD wwin-d awal ɣef tegnit n tsertit teddir tmurt-nneɣ d wayen yerzan tifranin n tselwit n 7 deg Cṭember , anida tuget n Yizzayriyen ugin ad kkin deg tefranin-agi. Tifranin-agi i iɣunza wegdud werǧin teḍri deg umezruy n tefranin deg tmurt n Lezzayeer. Ilmend n waya akabar n RCD yenna-d yakan deg wulɣu yezrin d akken azal n uttekki deg tefranin-agi ur iɛeddi ara azal n 18% ulamma llan kra i d-yeqqaraen d akken ur yewwiḍ ara azal n 10 % deg wakal n Lezzayer d 4% ɣer Yizzayriyen yettidiren deg tmura tiberraniyin.
Ulac ccekk d akken asbedded n Abdelmadjid Teboune yesnerna deg uɛzal n yiḥricen n tmetti , ilemẓiyen, d yimeɣban, d yigensasen idamsanen ur yeddin ara tikli n udabu, mebla ma nettu lḥers i d-yeɣlin ɣef yiɛeggalen n tedbelt ddaw n yisemn uḥareb ɣef terzdeg n tefranin. Annect-a akk yerna adabu yečča teyita qessiḥen sɣur agdud yugin ad yettikkin deg tefranin deg yal tamiwin n tmurt. Annect-a yesɛa anamek meqqren d akken agdud yuɣal ur yesɛi ara laman deg udabu n tmurt-is.
D tidet, xemsa n yiseggasen i iɛeddan, nnan-aɣ-d, akken ad nessiweḍ agdud ɣer wayen yessaram s yisem n « LEZZAYER TAMAYNUT » ara d-ilalen seg umussu n Fuṛaṛ n 2019. Maca tamurt-nneɣ teqqim kan akken tella, ur yelli umaynut deg tsertit ay d-wwin yimḍebren-a. Ayen yellan d amaynut d tugdi d lxuf i d-sseɣlin ɣef Yizzayriyen deg yal iswiren n tudert, imi ara ass-a mazal imeḥbas deg yissekrafen, rnu ɣur-s acemma ur ibeddel akken yessaram wegdud imi tasertit n tmurt ass-a tedda kan d tmuɣli n wid yeṭṭfen leḥkem.
Tiwaculin akked yal tamnaḍt n tmurt ddrent deg lḥers i d-yessers udabu ɣef wegdud, ladɣa seld tifranin-agi n tselwit. Iɣallen n laman ṭṭfen kra n yimeɣnasen axaṭer ur ddin ara d uxemmem n udabu, imi nnan-d kan tiktiwin-nsen akken ad nidir deg tugdut d talwit. Ayen akk yessaram wegdud ur d-yeḍri deg tilawt imi iswi n udabu d akken asirem n wegdud ad yili deg lqefs. Annect-a yesseɣli-d tugdi deg wulawen ɣef uzekka n tmurt.
Abrid i d-yewwi udabu seg 2019 d win ineqqen tilelli, d win yesseddayen timsal n tmurt ilmend n tegnit ur nesɛi axemmen ɣer sdat, ur iheyyi ara tifrat i wayen i izemren ad d-yedṛu, ama deg uḥric n tdamsa, deg tmetti akked tikli n udabu akked tmura tiberraniyin. Imi adabu ibedd kan ɣer wayen i t-iceɣben, yeǧǧa agdud deg rrif , ayen yeǧǧan tiwaculin, ilemẓieyn ad awin abrid n tfelukin akken ad zegren lebḥur ɣer tmura tiberraniyin. Annect-a yeskanay-d leɣben n wegdud.
Deg tegnatin-a, asiwel ɣer tefranin n tselwit uqbel ad fakken 5 n yiseggasen yellan deg lqanun mebla ssebba i ibanen yeskanay-d arway yellan ger wid yeṭṭfen adabu, d lebɣi akken ad ṭṭfen agdud deg texnaqt.
Ɣef wakka attekki ɣer tefranin-agi d ttawil akken ad qqimen wid yeṭṭfen adabu deg yimukan-nsen. Am akken nezmer ad d-nini d akken tiɣri i d-gren yimḍebren i wegdud akken ad yettekki deg tefranin-a d ayen ur nezmir ad d-yili axaṭer abrid i yewwin wid yellan deg udabu d win n wegdud yemxalaf. Ɣef waya akken ad yessiweḍ wegdud tiɣri n yir tignatin deg i yettidir yeddem ṛṛay iɣunza tifranin-agi.
ɣef wakka, wid yuzlen akken ad ttekkin deg tefranin-agi imi i d-qqaren d akken bɣan ad ssiwḍen awal-nsen i wegdud, ẓran s wallen-nsen uqbel ass n tefranin d akken llan wid i ten-yezwaren ɣer ucali ger texxamin n L’ANIE. Tasmilt i d-yesbedd yimḍebber n lɛesker n tmurt ɣef wakken i d-yenna Chorfi s yiles-is, akken ad sɛeddin tifranin n 12/12/2019. Ilaq ad nesmekti d akken d RCD i d-yessawlen akken ad tili tseqamut tilellit ara yessedduyen tifranin, ayen ɣef i msefhamen akk wid yellan deg temilit n Mazafran. Am lɛadda adabu yeddem tikti d acu kan yerra-tt akken ara tili di lfayda-nsen. Akken win ara yili d imḍebber ɣef tseqamut-a ad yesɛu yiwet n tmuɣli d uselway n tigduda. Ssusmen ɣef tikli ɣef yisuḍaf n tseqamut-a almid asmi i asen-tekkes azref-nsen. Nezmer ad d-nini d akken annect-a yella-d axaṭer llan wid yellan deffir-nsen fkan-asen ḍmana d akken ad ssiwḍen ad ṭṭfen amkan n uselway n tigduda. D acu kan tagi d taqsit-nniḍen. Ilaq kan yal yiwen ad yeddem tamsirt seg tikli-agi n wungifen. RCD ur yesɛi iɛdawen anagar wid yebɣan d akken agdud ad yeqqim d igellil yerna ad yidir deg ddel, aɛdaw-agi d adabu yellan ass-a d imḍebber ɣef tmurt n Lezzayer.
Ass-a mačči d tamsalt n uḥasseb neɣ d ameslay ɣef win yellan d aḥeqqi neɣ win ur nelli ara d aḥeqqi, neɣ ɣef win iḍelmen. Yessefk ad ldin tamuɣli akken ad seḥbibren ɣef tmurt seg yiwen n uɣelluy i izemren ad yennal tadukkli n tmurt akked tɣellist n uwanek. Maca annect-a ur yezmir ara ad d-yili ma nettmeslay kan ɣef ssebbat i yeǧǧan tamurt-nneɣ ur teddi ara ɣer sdat akked lebdi n tigduda tatrart ara yesseḥbibren ɣef yizerfan n wegdud-is , tin ara yeddu tmudemt( modernité) akked tneflit
RCD yettwali tifranin-a zemrent ad ilint d tiseɣlit i wid yeṭṭfen adabu. Imi wid yettḥaraben ɣef tmendawt ur sɛin ara ṛṛay deg tseqamut ad ttḍebbiren, ɣef wannect-a ilaq ilaq ad ddaklen iɣallen akken ad nesbedd tayeḍ deg umkan-is, tin ara yilin d tilellit, ara yeddem ṛṛay akken bɣan mebla ma yella-d walbeɛḍ deffir-s. annect-a akk yezmer ad yeglu s wayen ur nelhi i tmurt ladɣa imi ɣer tilisa n tmurt-nneɣ llan yiserdasen n tmura tiberraniyin, ttrajun kan ma yeḍra-d kra akken ad d-gren iman-nsen.
Ulac ccekk d akken abarek n tefranin-a sɣur timura n Russ , Emarate akked Fransa ur d-llint ara kan akka axaṭer d imedukkal. Ma yella zik annect-a yettili-d ilmend lfaydat ay sɛan tmura-agi deg wannar n tdamsa, ass-a tagnit temgarad.
Deg teswiɛt yuɛren am ta, RCD iwala d akken tifrat yelhan tezmer ad d-tili ma sdukklen yimeɣnasen akken bɣunt ilint tmuɣliwin-nsen tisertanin , ama d ikabaren n tsertit, d inmula (syndecalistes), d iɛeggalen n tdukkliwin rnu-d ɣur-sen wid yellan ass-a sdaxel n udabu.
Agraw-nneɣ i d-yettaken timuɣliwin-is deg yir tignatin i izemren ad tḍur tadukkli taɣelnawt akked uzekka-ines n tmurt-nneɣ, yettwali d akken d akken ayen i d-yefka d iwellihen i uskasi aɣelnaw ɣef ara d-yili umsefhem ar ass-a mazal-it yesɛa-is deg wannar.
Ger wayen i ilaqen ad d-yedru d amezwaru d aserreḥ i yimeḥbas n tsertit akked rray. Tulya n wannar n tsertit taywalt akked tukksa n leqwanen yessekrafen tilelliyin.
Ɣer tagara, tamarayt taɣelnawt tettheyyi-d yiwet n temlilit akked tɣamsa deg wussan-a i d-itedduakked uheyyi n tesdawit n unebdu n ukabar deg uzger anegaru n wayyur n Tuber 2024
Lezzayer 13 deg Cṭember 2024
